Zimowo wyliczanka

Wyliczanka wyliczanka
Ze słóweczek rymowanka
Jak godómy tak piszymy
Ślónskóm godkóm sie szczycymy
A że zima tera mómy
Na szlincuchach se kjołzómy
A wy łyżwy mocie
To po lodzie sie ślizgocie
Wy na nartach,my na skijach
Bydymy s kympy wywijać
Makówy na rynkach mómy
A wóm rynkawiczki dómy
Te skórzane ,to glazyjki
To geszynk czyli prezynt
Łod ciotki Maryjki
Mantel s pelcym łoblykómy
A wóm płaszcz s futerkym dómy
Wy mocie kaptur,a my kapuca
Kjero we mrozy przykryje palica
A ciebje łogrzeje głowisia
Łu nos kurzawy ,łu wos zawjeje
Zrobi sie zumjynt,a u wos zaspa
Bo łu nos fujo,a łu wos wjeje
Łu wos gołoledź,a łu nos szklónka
Jedź se na sankach,a jo na sónkach
Ślisko to gładko i lyznóć idzie
Czyli wywrócisz sie i zajś żeś w bjydzie
Łu nos sóm ciómpy,a u wos sople
Kjej słónko śwjyci kapjóm z nich krapki,a łu wos krople
Łu wos sóm sanie,a łu nos srómbek
Za kjerym cióngnie łogónek czyli sónek rzóndek
Łu nos je szpyrka,łu wos słónina
Kjero sie dziubjóm ptoszki we zima
Łu wos onuce,u nos fuzlapy
Do guminioków czyli gumowców kjej łodwilż i chlapy
A kjej mróz srogi mómy na dworze
My hajcujymy,wy ogrzewacie w zimowej porze
I tak ło zimje sam łosprowjómy
Dyć jeszcze dużo słóweczek mómy
Bo to ni koniec je wyliczanio
Trza nowo wyliczanka do napisanio

Urszula Oślislok